Compagnes y Compagns,
te Mareo rodel chisc dis n messaje Whatsapp olache al vëgn dejaconsié da lascé te na botëga d’Al Plan patüc sön les scafes „Cörs dla Val Badia“, deache al foss na ëra da foradecá che les romëna jö vigni de.
Chësc messaje unse ince nos ciafé en sëra y bele incö da doman sunse jüs te botëga a damané sce chësc é vëi. Resposta tlera dla boteghiera: AL N’É NIA VËI.
Le grup de laur de „Cörs dla Val Badia“ oress tó chësta ocajiun por dí che i porvun de vigni vers da lauré cun trasparënza y i fajun döt le poscibil por che l’aiüt röies tles dërtes mans. Sön nosta plata internet ciafëise nüsc inoms, i ciafëis i inoms dla comisciun che tol la dezijiun sön i contribuc. Y por nos él tler che i garantiun la DISCREZIUN TOTALA sön chi che fej domanda.
Nos un ion sce i podun ti jí do atira ales chestiuns, porchël damanunse ince os, Compagnes y Compagns, da nes comuniché sce i ëis propostes, impulsc, o sce i odëis situaziuns che ne ves scüsa nia. Ion azetunse ince critiches costrutives. Deboriada cun os podunse garantí ciamó deplü che le proiet vais inant bun.
Dl ater vers periunse dër bel da mëte averda cun mené fora messaji cun chësta sort de contignüs. I savun che i social roda tan snel y che al basta veramënter püch por desdrüje tröp. Chiló nen vára de n proiet intier che s’á damané y se damana tres ciamó n gröm de tëmp. Al é tröpes porsones che á lauré y laora dötaorela debann por le fá funzioné. Al foss sciode sce al gniss descredité cun informaziuns falzes.
Dilan de Osc aiüt, Dilan de Osta colaboraziun, Dilan de Osc cör.
