Da oramai 10 dis incá ciafon te 13 botëghes de alimentars les scafes „Cörs dla Val Badia“, olache jënt á la poscibilité da cumpré val’ surapro y le lascé lassura, y chi che á debojëgn pó se tó ci che ai adora. La jënt dla Val Badia á cina sëgn mostré davëi n cör dër davert. Deache i savun che tröc ne s’infida nia da se tó le patüc jö dales scafes, magari ince por n sentimënt de dodanza, â le grup de laur bele denant preodü da mëter sö ince döes bancareles dl mangé (banch alimentar), olache la jënt pó jí te n’atmosfera plü resservada. Dlungia la bancarela dl mangé a Badia, che laora cun suzes bele da 4 agn incá, deura les portes en vëndres ai 26 de merz ince ince les bancareles dl mangé a San Martin y Al Plan.
La bancarela dl mangé da San Martin é daverta vigni vëndres dales 9:30 ales 11:00, tl frabicat dl sport
La bancarela dl mangé d’Al plan é daverta vigni vëndres dales 9:30 ales 11:00, tl local dl Zënter Families Mareo
Anuzede chësta ocajiun. Tla Val Badia n’unse bonamënter degügn che n’á propi nia da mangé. An sá indere che le patüc da mangé fej fora na gran sona dl bilanz familiar. Le sostëgn tres i alimentars é ponsé por ti dé a porsones y families na alisiraziun finanziara y forsc ince psicologica.
Tla bancarela dl mangé pó gní chi che pó avëi öga da chësc sorvisc, y forsc ince porsones che sá de jënt che adora, y che pó forsc ti porté val’ a ciasa.
Les trëi bancareles dla Val Badia ó ince tigní adöm y colaboré. Por chësc fin él sté incö a San Martin na incuntada cun Calogero Di Cara de „Banco Alimentare Trentin-Südtirol“, le coordinadú dla Bancarela de Badia Igi Dapunt, y Annamaria Fiung y Pablo Palfrader dl proiet „Cörs dla Val Badia“.
