info@solidariete.it

La lëtra de na uma jona

En chësc de nes él rové adalerch na lëtra scrita a man da na uma jona. Ara tira sö sora sü mituns, ara á n auto da mantigní, n cuatier da paié, y é da d’altonn incá zënza laur. Tla lëtra nes scrí chësta uma che süa situaziun vëgn strënta, y ara nominëia aspec che al é forsc plü porsones che sint.

Ara scrí insciö: „I ne m’infidess mai da mené mies fatures a Cörs dla Val Badia, i ne m’infidess mai da jí te val’ botëga a me do val’ che i podess adoré“. La tëma de chësta uma stá en pert ti iudizi dla jënt, che valutëia baldi gonot ci che ara vëiga defora ia, zënza savëi les realtés che stá do ia.

Ince le grup de laur de „Cörs dla Val Badia“ sá che al é püces porsones che s’infida da tó jö val’ da mangé dales scafes te botëga. Chësc é ince da capí y da respeté. Rodunt porchël unse preodü da mëte sö les bancareles dl mangé, olache an pó gní adalerch te na atmosfera plü resservada y olache al é volontares y volontars che dëida ion. Bancareles él a Badia, a San Martin y a Al Plan. Sce zacai ne s’infida nia da jí te so paisc o tl paisc dlungia, pói zënzater s’infidé da jí ti atri paisc. Chiló ciafëise i orars https://solidariete.it/n-aiuet-por-19-families/

Y por ci che reverda le mené ite fatures, oresson veramënter mëte a cör: Sce i sëis te na situaziun olache ara „vëgn strënta“, por adoré les parores dla uma jona, menede ite les domanda. Al ne costa nia y da pert dla comisciun che valutëia vëgnel garantí döta la discreziun. Inoms ne röia nia defora dala comisciun.

I criters por podëi fá domanda é:

residënza tla Val Badia, sparagns nia plü alc co 7.500,00€ (da documenté cun na stampa dl saldo dla banca), dificoltés da paié cunc/fatures por bojëgns primars.

Bojëgns primars pó ester:

forza eletrica, scialdé, afit, material por la scora, spëises de carater sanitar. Pro les spëises sanitares oresson alzé fora en particolar che la sanité mentala é por nos ince n debojëgn primar, porchël, sce al foss caji olache al jiss debojëgn de n sostëgn por na terapia, podunse ion ciaré te ci mosöra che ara vá da daidé. Le medemo vel por sostëgns che reverda le bëgnsté dla familia.

Deplü ciafëise chiló: https://solidariete.it/contribuc/

Dilan ala Uma por s’avëi tut la bria da nes scrí. Al nes á fat plajëi.

Rai de speranza

„Cörs dla Val Badia“ é n proiet porté da porsones fora dla vita soziala, religiosa y economica dla valada, che á orü lié les forzes por lascé slominé n rai de speranza y dé n messaje positif te n tëmp olache tröpes porsones á crüzi y fistidi.

News

Bancarela dl mangé a Picolin
27. August 2021
Dilan ai Scizeri d’La Pli
12. Juli 2021
Na uma scrii y rengrazia
18. Juni 2021