info@solidariete.it

Tigní adöm

IMPULSC

Bele sëgn unse tröp te nostes mans por nes sostigní l’un cun l’atra y dé nosc contribut por che nostes families, vijinanzes, paisc y valades sisdes posć da sté saurí.

Sëgn y tl dagní él important da tigní adöm.

 

Chiló ves pitunse val’ impulsc

Buna vijinanza

Tignun i edli daverc sön les porsones che nes é incëria y sü debojëgns. Na telefonada a zacai che é susc, tëmp por s’la cunté, daidé fá val’ scüfs, ti fá n plajëi a zacai, ti dé n sostëgn uman y pratich tl debojëgn. I podun descurí che scinché y fá val’ por i atri é n arichimënt ince por chi che le fej.

Cumprun ite te nostes botëghes

Sce i jun a cumpré tles botëghes de nüsc paisc podunse ti dé n contribut concret a nosta economia y nosta jënt. Se recordun ince dles pices botëghes y dles botëghes söi lüsc da paur.

Cumprun local

Te nosta provinzia y nosta valada unse de bugn produc. Cumpré söl post ó dí sostigní la morona economica locala, ciafé produc sagns y de cualité, y produc a km 0. I fajun val’ por nosta jënt y por l’ambiënt.

Jun te nüsc locai

N cafê, n aperitif, na serada en compagnia, na marëna o na cëna. Canche i podun rodé, él important da nes conzede de bi momënc: cun la familia, cun colegs o en compagnia. I un tla valada de bi bars y bistrot, ostaries y restoranc da sté saurí y che an mangia bun.

Na vacanza te ciasa

Che á pa dit che al mëss dagnora ester le post esotich? Ince na vacanza te n hotel de nüsc raiuns o na fin dl’edema te nostes üties da munt scinca palsa, pêsc y regeneraziun.

Tolun nüsc artejagn

Tla Val Badia unse artejagn competënc y che á gran förtl te so mistier. Por de pici y de gran laurs, damanun porchël i artejagn de nüsc paisc. N contribut concret a nosta economia y nosta jënt.

Por la sanité y belëza de nosc corp

Che al sides salons da friser, estetistes, massöres o terapisć. I un tla Val Badia n gröm de artejanes y artejagn dla sanité y dla belëza, che laora cun competënza y profescionalité. Sce i un debojëgn, orunse ince ponsé a d’ëi.

Fajun ci che nes fej bun

Curé la spëisa dl’anima, la spiritualité, na spazirada tla natöra, tëmp por destaché, nes fá val’ de bun por le plajëi da le fá. Sc’i nes stun saurí cun nos instësc, nes stunse ince plü saurí cun i atri.

Rengrazié

Ester reconescënc, rengrazié por les porsones incër nos ia y por les cosses che gareta ince te chësc tëmp, nes deura i edli por la reconescënza, che é tres danü fontana de forzes y creativités positives.